ရွှေချစ်သူမိဘပြည်သူများအတွက် ၂၀၀၀ ခုနှစ် နောက်ပိုင်းမှစ၍ စတင်ခေတ်စားလာသော ထိုင်းရွှေ (ယိုးဒယားရွှေ) ဟုခေါ်သော ရွှေအကြောင်းနှင့် ထိုင်းရွှေသည် အခြားသော နိုင်ငံများတွင် ရောင်းဝယ်မှု ပြုလုပ်နိုင်မနိုင်၊ ရွှေအရည် အသွေး အကြောင်းနှင့်မည်သို့သော အကြောင်းများကြောင့် ခေတ်စားလာရသည့်အကြောင်းအရင်းများကို လေ့လာတွေ့ရှိချက်များအရ အခြေခံပြီး မျှဝေတင်ဆက်ပေးလိုက်ပါသည်။
ထိုင်းရွှေသည် အများအားဖြင့် ၂၃ ကာရက်ရှိပြီး အလွန်သန့်စင်ပြီး တန်ဖိုးရှိသည့်ရွှေဖြစ်သည်။ ၎င်းသည် အရောင်အားဖြင့်လည်း ပိုမိုအဝါရင့်သည့်ဘက်သွားပြီး တောက်ပသည့်အရောင်ရှိသည်။ ထို့အပြင် ၎င်းထိုင်းရွှေသည် ၂၃ ကာရက်ရှိသော်လည်း သာမန်ထက်ပိုသည့် အကြမ်းခံနိုင်သောကြောင့် ဈေးကွက်ထဲတွင်ရင်းနှီးမြှုပ်နှံမှုအလားအလာအမြင့်ဆုံး ရွှေစင်တစ်ခုဖြစ်လာနေပြီဖြစ်သည်။
သမိုင်းကြောင်းအရ ၁၉၃၉ ခုနှစ်အထိ ထိုင်းရွှေကို Siam ဟုခေါ်ပြီး Siam ဟူသောအမည်သည် သက္ကတဘာသာဖြင့် ရွှေဟု အဓိပ္ပါယ်ရသည်။ တရုတ်တို့က ထိုင်းနိုင်ငံကို ‘ရွှေကျွန်းဆွယ်’ ဟု ခေါ်ဆိုကြသည်။ အိန္ဒိယလူမျိုးများက ထိုင်းနိုင်ငံကို ‘ရွှေပြည်’ ဟု ခေါ်ကြသည်။ ထိုင်းနိုင်ငံသည် ဗုဒ္ဓဂုဏ်တော်ဖြင့် ထုလုပ်ထားသည့် ဧရာမရုပ်ပွားတော်များ၊ ထိုင်းဘုရင်ကြီး၏ နေအိမ်များကို ရွှေဖြင့်ထုလုပ်သည်ဟု လူသိများသည်။ သမိုင်းစာပေအရ ဗုဒ္ဓ၏အရေပြားသည် ရွှေရောင်အဆင်းရှိသည်ဟု ယူဆကြသောကြောင့် မိရိုးဖလာ ဗုဒ္ဓရုပ်ပွားတော်များနှင့် အခြားဘာသာရေးရုပ်ပွားတော်များကို ရွှေဖြင့် ပြုလုပ်လေ့ရှိသောကြောင့်ဖြစ်ပါသည်။
ရွှေသည် ထိုင်းနိုင်ငံ၏ အကြီးမားဆုံး ပို့ကုန်တစ်ခုဖြစ်သည်။ အခြားသော ထိုင်းပို့ကုန်ကြီးများမှာ ရေနံ၊ ဆန်၊ ရော်ဘာနှင့် စိန်များဖြစ်သည်။ ၂၀၀၄ ခုနှစ်တွင် ထိုင်းနိုင်ငံမှ ရွှေလက်ဝတ်ရတနာ ဘတ် ဘီလီယံ ၃၀ ကျော် တင်ပိုခဲ့သည်။ ထိုင်းနိုင်ငံမှ ရွှေကို အမေရိကန်၊ ဗြိတိန်နှင့် ဟောင်ကောင်သို့ တင်ပို့သော်လည်း ပုံမှန်အားဖြင့် ၁၀ ကာရက်၊ ၁၄ ကာရက်နှင့် ၁၈ ကာရက်ရှိသော ကျောက်မျက်ရတနာများလည်းပါဝင်ပြီး ၂၃ ကာရက်ရှိသော သန့်စင်သော ရွှေစင်များလည်းတင်ပို့လေ့ရှိသည်။ မကြာသေးမီနှစ်များအတွင်း ထိုင်းရွှေသည် ဈေးကွက်သို့ ဝင်ရောက်ခဲ့ပြီး ထိုင်းနိုင်ငံတွင် ရွှေဆိုင်များသည် နိုင်ငံတစ်ဝှမ်းတွင် ရွှေဆိုင်ပေါင်း ၆၀၀၀ ကျော်ဖြင့် ထွန်းကားသောကဏ္ဍတစ်ခုဖြင့် ကုန်သွယ်မှုပြုလုပ်နေပြီဖြစ်ပြီး ဘန်ကောက်တွင် ရွှေလက်ကားရောင်းချသူ ၆၀ ဦးထက်မနည်းရှိသည်။
ထိုင်းရွှေသည် ယေဘူယျအားဖြင့် ၂၃ ကာရက်ရှိသည့် ရွှေများကို “၉၆၅” ဖြင့် တံဆိပ်ခတ်ထားသည်။ ဤရွှေသည် ၉၆.၅% သန့်စင်သောရွှေဖြစ်ပြီး အခြားသတ္တုများ၏ ၃.၅ ရာခိုင်နှုန်းမှာ ငွေနှင့် ကြေးဝါတို့ဖြင့် ရောနှောထားခြင်းဖြစ်သည်။ ထိုင်းရွှေ၏ ထူးခြားချက်သည် အခေါက်ရွှေကဲ့သို့ မီးလင်းခြင်းဖြစ်ပါသည်။ အဘယ်ကြောင့်ဆိုသော် ရွှေရည်စပ်သော နေရာတွင် ကြေးနီနှင့် အစပ်ဘဲ ဘော် (ငွေစင်) နှင့် စပ်ထားသောကြောင့်ဖြစ်ပါသည်။ အချို့သော ထိုင်းကုန်သည်များသည် ရွှေ ၂၂ ကာရက်၊၂၀ ကာရက်ရွှေနှင့် ၁၈ ကာရက်ရွှေများကိုလည်း ရောင်းချပေးပြီး ၂၃ကာရက်သည် ထိုင်းတွင် ရေပန်းအစားဆုံးဖြစ်သည်။ မိမိဝယ်ယူထားသော ထိုင်းရွှေကို အမေရိကန်တွင်သာမက ကမ္ဘာတစ်ဝှမ်းလုံးတွင် ရောင်းချနိုင်ပါသည်။
ယခုဖော်ပြပေးခဲ့သော အကြောင်းအရာလေးသည် ထိုင်းရွှေ (ယိုးဒယားရွှေ) ကိုစိတ်ဝင်စားပြီး ရွှေအကြောင်းစိတ်ဝင် စားသော မိဘပြည်သူများအတွက် အကျိုးကျေးဇူးရရှိစေမယ်လို့ယုံကြည်မိပါသည်။
