ရွှေအတုအစစ် ခွဲခြားနိုင်သော နည်းလမ်းများ

ရွှေချစ်သူ မိဘပြည်သူများအတွက် ရွှေဝယ်ယူသည့်အခါတွင် ရွေးချယ်မှု မမှားစေရန်အတွက် အသုံးဝင်နိုင်သော ရွှေအတုနှင့်အစစ်ခွဲခြားနိုင်သည့် နည်းလမ်းများကို ဗဟုသုတရရှိစေရန် အားလုံးအတွက် မျှဝေပေးလိုက်ပါသည်။

ရွှေအစစ်သည် သိပ်သည်းဆရှိပြီး ရွှေ၏အလေးစ (AU) မှာ 196.9665 ရှိပါသည်။ ရွှေအတုအစစ်ခွဲခြားရာတွင် သာမန်မျက်စိဖြင့် ခွဲခြား၍မရနိုင်ပါ။ အကျစ်ထည်ဆိုလျှင်အတုအစစ်ခွဲခြားရသည်မှာ ပိုမိုလွယ်ကူပါသည်။ ပုံမှန်အားဖြင့် ရွှေအစစ်အမှန် ဖြစ်လျှင် Marking အမှတ်အသား တစ်ခုခုရှိနိုင်ပါသည်။ မိမိဝယ်ယူထားသော ရွှေထည်ပစ္စည်းများတွင် Marking အမှတ်အသား တံဆိပ်ကို ရွှေထည်ပစ္စည်းများ၏ အတွင်းဘက်နှင့် ချိတ်အစွန်းနားတွင် ဖော်ပြလေ့ရှိသောကြောင့် မိမိကိုယ်တိုင်စစ်ဆေးနိုင်သလို ရွှေဆိုင်၏အကူအညီနှင့်လည်း စစ်ဆေးနိုင်ပါသည်။ အခြားသတ္တုဆိုလျှင် Marking အမှတ်အသား မရှိသည့်အတွက် ရွှေအစစ် ဟုတ်မဟုတ်ကို ခွဲခြားသိရှိနိုင်ပါသည်။

ရွှေအတုအစစ်ကို သံလိုက်ကို အသုံးပြု၍လည်း စစ်ဆေးနိုင်ပါသည်။ ရွှေအစစ်ဆိုလျှင် သံလိုက်၏ဆွဲငင်အားကို လွန်ဆန်သောကြောင့် သံလိုက်တွင်ကပ်နေမှာ မဟုတ်ဘဲ ရွှေအတုဆိုလျှင် သံသတ္တုပါဝင်နိုင်သောကြောင့် သံလိုက်နှင့် ထိတွေ့လျှင် ကပ်ပါလာနိုင်ပါသည်။ သံလိုက်ကိုအသုံးပြု၍ စစ်ဆေးခြင်းသည် အလွယ်အကူဆုံးနှင့် အချိန်ကုန်သက်သာစေသော နည်းလမ်းတစ်ခုလည်းဖြစ်ပါသည်။

 

 

နောက်ထပ်နည်းလမ်းတစ်ခုသည် Nitric (နိုက်ထရစ်) အက်ဆစ်ဖြင့် စမ်းသပ်ခြင်းဖြစ်ပါသည်။ မိမိ၏ရွှေထည်ပစ္စည်းသည် Nitric (နိုက်ထရစ်) အက်စစ်နှင့်ထိ၍ အရောင်မပြောင်းလဲလျှင် အစစ်ဟု သတ်မှတ်နိုင်မှာဖြစ်ပြီး ရွှေအတုဆိုလျှင် Nitric (နိုက်ထရစ်) အက်စစ်အရည်သည် ပူစီဘောင်းအမြှုပ်လေးများထလာပြီး အပေါ်ယံ Coating သည် အရောင်ပြောင်းလဲသွားမည်ဖြစ်ပါသည်။ သို့သော် အက်စစ်ကိုအသုံးပြုရမည်ဖြစ်သောကြောင့် အန္တရာယ်များသည့်အတွက် မိမိကိုယ်တိုင် အိမ်တွင် မစစ်ဆေးရန် အကြံပြုချင်ပါသည်။

 

 

အထည်ပစ္စည်းတစ်ခု၏ အတွင်းပိုင်းကို ရွှေအစား ကြေး၊ ငွေနှင့် အခြားသတ္တုပစ္စည်းထည့်ပြီး အပေါ်ယံကိုသာ ရွှေဖြင့်ပြုလုပ်ထားလျှင် ရွှေအတုအစစ်ဖြစ်ကြောင်းကို မှတ်ကျောက် (အချော) တိုက်ပြီး ရွှေရောင်ပြောင်းမပြောင်းသိနိုင်ပါသည်။ ငွေ၏အလေးစ(Ag)မှာ 107.86 ရှိပြီး ကြေး၏အလေးစမှာ 63.546 ဖြစ်ကာ အဖြိုက်နက်၏ အလေးစမှာ 183.85 ရှိပါသည်။

 

 

နောက်ထပ်နည်းလမ်းတစ်ခုသည် မီးဖုတ်၍ ရွှေအတုအစစ်ကို ခွဲခြားနည်းဖြစ်ပါသည်။ ရွှေအစစ်ဆိုပါက အရောင်ပြောင်းလဲခြင်းမျိုး မရှိပဲ ရွှေအတုဆိုပါက အရောင်ပြောင်းလဲသွားမည်ဖြစ်ပါသည်။ သို့သော် မီးအရမ်းပြင်းလျှင် ရွှေသည် အရည်ပျော်နိုင်သည်ဆိုသည့် အချက်ကိုတော့ သတိထားသင့်ပါသည်။

 

 

ရွှေအတုအစစ်ကို မီးဖုတ်ပြီး ငရဲမီးထဲ စိမ်ကြည့်၍လည်း အရောင်ပြောင်းမပြောင်း သိနိုင်ပါသည်။ သင်၏ အရေပြားကို အခြေခံပြီး စမ်းသပ်ခြင်းဖြင့်လည်း ရွှေအတုအစစ်ကို ခွဲခြားနိုင်ပါသေးသည်။ ရွှေအစစ်ဖြစ်ပါက မိမိ၏ရွှေထည်ပစ္စည်းကို အချိန်ကြာသည့်တိုင်အောင် ဝတ်ထားပါက အရေပြားပေါ်တွင် ထွက်လာသည့်ချွေးနှင့် သာမန်ဓာတ်ပြုမှုသာ ဖြစ်ပြီး အရောင်ပြောင်းလဲခြင်းမျိုး မရှိနိုင်ဘဲ ရွှေအတုဖြစ်ပါကသိသာသည့် အရောင်ပြောင်းလဲမှုမျိုးကြုံတွေ့ရနိုင်ပါသည်။ သို့သော် ထိုနည်းလမ်းသည် အခုခေတ်တွင် ပိုမိုမြင့်မားသော နည်းပညာများကို အသုံးပြုထားသော ရွှေအတုများအတွက်ဆိုလျှင် ချက်ချင်းသိသာစေနိုင်ခြင်းရှိမည် မဟုတ်ပါ။

 

 

အထက်ပါဖော်ပြခဲ့သော ရွှေအတုအစစ်ခွဲခြားနိုင်သော နည်းလမ်းလေးများအပြင် မိမိဝယ်ယူခဲ့သောရွှေထည်များအပေါ် အာမခံချက်ရှိသည့် ရွှေစစ်ဆေးမှုမျိုးကို ပြုလုပ်ပေးနိုင်သောနေရာများတွင်သာ ရွှေအတု၊ အစစ်ကို စစ်ဆေးခြင်းဖြင့် တန်ဖိုးအတိအကျ၊ ပဲရည်အတိအကျကို သိနိုင်မည်ဖြစ်သောကြောင့် ပိုမိုတိကျခိုင်မာသော စစ်ဆေးမှုများကိုပြုလုပ်ရန် အကြံပြုတင်ပြလိုက်ပါသည်။